1. As máquinas simples
Que son?
As máquinas simples son aquelas que están formadas por poucos elementos e
que son capaces de modificar a forza que se exerce sobre elas. As máquinas
simples son máquinas manuais. Entre elas figuran a roda, a polea, o plano
inclinado e a panca:
- A roda é un corpo en forma de disco ou cilindro que xira ao redor dun eixe.
Úsase para desprazar cargas, debido a que diminúe o rozamento. Supuxo un
dos grandes inventos da humanidade e revolucionou o transporte.
- A polea é unha máquina formada por unha roda e unha corda que pasa polo
seu perímetro. Serve para elevar obxectos pesados dunha forma máis fácil.
- O plano inclinado, ou rampla, está formado por unha superficie inclinada
que diminúe a forza necesaria para elevar un obxecto. Canto menor é a súa
inclinación, menor é a forza necesaria para elevar o obxecto.
- A panca é unha barra ríxida que se apoia nun punto e que multiplica a forza
que se lle aplica. Existen tres tipos de pancas segundo onde se atopa o punto
de apoio.
- Panca de primeiro grao: o punto de apoio atópase entre a forza e a
resistencia.
- Panca de segundo grao: a resistencia atópase entre o punto de apoio e a
forza.
- Panca de terceiro grao: a forza atópase entre o punto de apoio e a
resistencia.
Se queres ampliar información sobre o tema, podes consultar esta páxina
do Instituto Nacional de Tecnoloxías Educativas e de Formación do
Profesorado (INTEF) dedicada ás máquinas simples [ver], ou estoutra
ofrecida pola Consejería de Educación da Junta de Andalucía [ver]. Así
mesmo, recomendámosche que visites o resumo sobre as máquinas simples
[ver] e os vídeos da panca [ver] e a polea [ver], incluídos na Gran
Enciclopedia Planeta.