1. 1. SARRERA
Historia apur bat
Arabako Mendialdean, hainbat modutan antolatu da eskola sistema gure historian.
Orain dela urte asko, esaterako, herri bakoitzak bere eskola izan zuen. Baina, herrixkek
biztanleak galdu ahala eta biztanleria zahartu ahala, herrietako eskola horiek desagertzen joan
ziren, bata bestearen atzetik, eta Mendialdeko haurrak eta gaztetxoak Kanpezura etortzen hasi
ziren ikasteko. Halaxe sortu zen Yoar izeneko eskola publikoa, 70eko hamarkadaren hasieran.
Hiru hamarkadako ibilaldi luzea egin du.
Gero, errealitate politikoa aldatu izanari esker, aukera egon zen Ikastetxea LH bat zabaltzeko,
eta, 1977an, Mendialdean euskaraz ikasteko zegoen eskaerari erantzuteko asmoz, Ibernalo
Ikastetxea LH sortu zen. Handik 20 bat urtera, berriz, 1997/98 ikasturtean Derrigorrezko
Bigarren Hezkuntza ezarri zenean, Kanpezu institutua sortu zuen Eusko Jaurlaritzako
Hezkuntza Sailak.
Azkenik, 2004an, Yoar eskola eta Ibernalo Ikastetxea LH batu egin ziren, eta horrela iritsi
gara gaur egun arte. Hiru ikasturtez bi zentroen bat-egitea antolatzen ibili eta gero, azkenean,
bat-egite hura guztiz legezkoa bilakatu da 2013/14 ikasturte honetan, MENDIALDEA IPI
izenarekin.
Gure eraikinak
Ikastetxeak bi eraikin nagusi ditu, eta kiroldegi bat. Tamalez, eraikin batetik bestera 200 m
daude, eta errepide batek zeharkatzen du tartea, irudian ageri den bezala:

2. DBHko eraikina oso egokia da, bai espazioei, bai bestelako baliabideei dagokienez. Haur eta
Lehenengo Hezkuntzako eraikina, berriz, guztiz desegokia; gainera, zaharkiturik dago, eta
egoera txarrean: ez dauka liburutegirik, ez jolastoki estalirik bazkalondoan eta eguraldi txarra
egiten duenean jolasteko, ez eta erabilera anitzeko gelarik ere. Ondoan, guardia zibilaren
kuartela dago, eta bi kamera dauzkate, gure ikasleak jolastokian dauden bitartean etengabe
grabatzen dituztenak. Horregatik guztiagatik, ez dugu aukerarik planifikatu nahi genituzkeen
proiektuak bideratzeko.
Hezkuntza sailean, bi eraikinetako baliabideak partekatzea proposatu digute. Baina, DBHko
eraikineko liburutegia edo beste edozein espazio erabili nahi izanez gero, ikasle gazteenak
eraikin batetik bestera eramatera behartuta egongo ginateke, eta horrek traba handiak
ekarriko lizkiguke: arriskua (gorago esan bezala, errepide bat dago bi eraikinen artean),
eskola orduak galtzea, eta bestelako eragozpenak (euriarekin bustitzea, materiala ahaztea,
berokiak jantzi beharra…).
Idazki honetan, jakitera eman nahi dugu gabezia horiekin guztiekin lan egin behar dugula eta
arazo horien konponbidea ez dagoela ez irakasleon ez familien esku; horrez gain, nahiz eta
askotan Hezkuntza saila eta Udala jakinaren gainean jarri, ezer gutxi egin dutela arazoak
bideratzeko.
Aurrera begira
Eragozpenak eragozpen, aurrera jarraitu nahian, irakasleok kontziente gara beste toki
guztietan bezala Mendialdean ere premia berriak sorrarazi dituela gaur egungo errealitate
sozialak Hezkuntzan. Haiei erantzuteko, hiru alor nagusiri helduko diegu ikasturte honetan
(bakoitzari dagozkion helburuak garatu ditugu beherago):

3. •
ANIZTASUNAREN TRATAERA: Gure ikasleen jakintza maila gora eraman nahi
dugu, eta bai ikasleen eta haien familien itxaropenak asebete ere, edozein direlarik ere
haien gaitasunak, jatorria, egoera sozioekonomikoa…
Eskualde honetan gure ikasleen artean dagoen aniztasunari erantzuteko, lehenengo eta
bigarren helburuak zehaztu ditugu.
•
HIZKUNTZA GAITASUNA: Gaur egun, mundu globalizatu honetan, hizkuntzak
oinarrizko tresnak bilakatu dira nork bere etorkizuna lantzeko.
Ingelesaren, gaztelaniaren eta batez ere –gure herri hizkuntza izanik– euskararen
erabilera sustatzeko eta indartzeko, hirugarren eta laugarren helburuak finkatu ditugu.
•
BERRIKUNTZA PEDAGOGIKOA: Badira 13 urte XXI. mendean sartu ginela, eta ia
gure ikasle guztiak mende honetan jaioak dira. Beraz, irakasleok erabiltzen dugun
metodologiak gaur egungo premiei egoki erantzutea nahi dugu; hala, gaur-gaurko
baliabide teknologikoak txertatu nahi ditugu gure irakaskuntzan.
Horregatik guztiagatik, berrikuntzari indartsu eta gogoz ekin nahi diogunez, bosgarren
eta seigarren helburuak finkatu ditugu.
Aurreko ikasturtean bezala, saiatu gara IUP laburra, argia, zehatza, irekia eta ikastetxearen
beste planekin (Hobekuntza plana, Hezkuntza proiektua, AJA...) koherentea egiten.