1. Happy Nezza B. Aranjuez 10 - Einstein
“Naririnig mo ba ang tinig ng mga abang api~”. Nang dahil sa napanood namin sa UMAK
theatre noong Setyembre 10, nabuhayan ang puso at isip kong mas pag-ibayuhin ang pag-awit
ng mga awitin mula sa klasikong henerasyon ng musika sa Pilipinas. Nakamamahanga ang bawat
bahagi ng palabas, hangang-hanga kami sa bawat eksena at kaganapan. Hihilingin mo na sana’y
nakapagtatanghal ka rin gaya nila at sana’y may talento ka rin na taglay nila.
Tunay na nakabibilib ang ipinakita ng bawat aktor at aktres sa tanghalan. Hindi mo
mababakas at mapupuna ang kaba sa kanilang kilos at itsura, marahil dahil matagal na silang
nag-eensayo para sa palabas na iyon o di naman kaya’y bihasa na sila sa larangan ng sining ng
pag-arte at pag-awit. Kakikitaan din ang bawat aktor ng husay sa pagsayaw, at ang kanilang
mga kilos lubos na kapani-paniwala at takaw-atensiyon. Di mo nanaising pumikit habang
pinapanood sila. Kung mapakikinggan mo naman ang kanilang mga tinig, tila dadalhin ka nila sa
kailaliman ng kasaysayan ng ating bansa. Bawat bigkas ng linya at salita, bawat tono na
lumalabas sa kanilang bibig, lubos na kapani-paniwala na sila nga ang mga bayani ng ating
bansa.
Isa lang ang ipinararating ng pagtatanghal, na may PAG-ASA ang mga Pilipino, na may bukas
pa ang Pilipinas. Ipinakita nila ang musikal na pagsasadula ng mga naganap sa kasaysayan
upang makalaya tayo sa pagkagapos sa ‘tin ng mga Kastila. Pangunahing karakter dito sina
Andres Bonifacio at ang kaniyang kasintahang si Gregoria De Jesus. Ipinakita rito kung paano
sila nakibahagi sa rebolusyon tungo sa kalayaan ng mga Pilipino. Marami pang tauhan ang
ipinakita sa palabas gaya nina Jose Rizal, Apolinario Mabini, Diego Silang, Pio Del Pilar, Emilio
Aguinaldo, Melchora Aquino at Santiago Bonifacio.
May mga bahagi ng palabas na nakakatawa, mayroon ding magaan ang pakiramdam na
nagpapakita kung gaano kapayapa at kasaya ang mga Pilipino kahit sila’y nasa gitna ng
pananakop ng mga dayuhan. Ang ibang bahagi ay puno ng takot at hinagpis dahil sa mga pang-
aabuso at pagmamalupit ng mga Kastila. Galit at damdaming nasyonalismo ang nangibabaw sa
karamihan mula sa mga eksena dahil na rin sa matinding damdaming ipinakita ng mga aktor na
bayani na makalaya na sa rehas at kadena na sumasakal sa kalayaan ng Pilipinas.
Mapoot man ang sinapit ng ating mga bayani, naipakita sa pagtatanghal na sila’y naging
dakila at nararapat lamang na sila’y na tingalain. Labis kong iniidolo ang mga aktor lalo na ang
lahat ng tumulong upang maging matagumpay ang palabas. Mula sa ayos ng stage, props,
backdrop, musika, awitin, ilaw, kasuotan, diyalogo, sayaw at pag-arte, labi na kahanga-hanga.
Maaaring maging inspirasyon sila sa maraming kabataan na ilabas ang talento nila upang mas
mapagyaman ang kultura at pagkakakilanlan nating mga Pilipino sa ating bangsang Pilipinas.