1. Boletín do Equipo de Normalización e Dinamización Lingüística
CEIP de Randufe Nº 30 xaneiro de 2012
Artigo 5.1 do Estatuto de
Autonomía de Galicia:
A lingua
propia de
Galicia é o
galego.

2. VOCABULARIO DAS RÚAS
Para irmos camiñando desde a escola ata Tui debemos ir pola beirarrúa, porque as estradas son perigo-
sas ao seren os lugares de tránsito dos vehículos. Mágoa que non sempre hai beirarrúas en todo o camiño,
polo que non hai outra solución que irmos pola beiravía, que é o espazo situado á beira das estradas, sepa-
rada dos carrís de circulación por unha liña continua. Xa antes de chegarmos a Tui atoparemos colectores
para o lixo e por suposto moitos sinais de circulación. Cando se camiña por estrada é moi recomendábel fa-
celo pola esquerda para ollar en todo momento os vehículos que circulan face a nós.
Ao entrarmos na cidade polo lugar do Seixal, encontraremos algún guindastre por mor dalgunha obra de
edificación. Se quixermos cruzar a calzada debemos facelo polos pasos ou pasadeiras de peóns, que son
eses espazos que ocupan as rúas con faixas intercaladas pintadas de branco. Outra cousa que podemos
observar e que as máis das casas adoitan ser de varios andares, que é como se denominan cada un dos
niveis en que se distribúen as vivendas
nestes edificios.
Se no canto de irmos camiñando imos
en coche ata Tui, teremos que deixalo en
algún lugar habilitado para aparcamento
de vehículos, cousa non sempre doada ao
non haber ningún aparcadoiro soterrado
e seren escasos os espazos en superficie.
O que acharemos sen dificultades son caixas de correos, hai unha
no medio do céntrico Paseo da Corredoira ou Corredoura.
Aparcamento non é o mesmo que aparcadoiro.
Aparcamento é a acción de aparcar e aparcadoiro é o lugar onde aparcar un vehículo.
O guindastre é unha máquina, a grúa é un paxaro.
Guindastre: Máquina para levantar e levar pesos dun punto a outro.
Grúa: Ave migratoria. A grúa é a femia da especie, o macho é o grou.