Carta de declaración de apoio ao ensino en galego para enviar individualmente polo profesorado á Plataforma Queremos Galego.

1. A Plataforma “Queremos galego” considera que estamos nun momento
fundamental para procurarmos a paralización do decreto do plurilingüísmo que
a Consellaría de Educación pretende levar adiante e para o que presentou, o
día 30 de decembro, as tendenciosas bases deseñadas para reducir a
presenza do noso idioma no ensino.
Neste momento, segundo declaracións do Secretario Xeral, a Consellaría
está analizando as alegacións e os informes que lle foron presentados, é dicir,
estará dándolle voltas a como seguir impoñendo o que eles nomean como
principios da súa proposta, despois de comprobar que están completamente
sós e que o único que conseguiron nestas semanas foi poñernos de acordo a
todos os que queremos a nosa lingua e non estamos dispostos a que sexa
reducido o seu uso: profesorado, representantes do profesorado, alumnado,
pais e nais, universidades, traballadores/as de normalizacións lingüística,
equipos de normalización lingüística, expertos doutros países, editores, ILGA,
RAG, Consello da Cultura Galega, MRPPs, etc.
Para a Plataforma, é inadmisíbel que, despois de anos de reivindicación e
compromiso, despois de anos e anos en que o profesorado galego pulou por
unha maior presenza do noso idioma nas aulas e na lexislación, despois de
anos de formación e dedicación, un goberno galegófobo pretenda botar por
terra tanto traballo, tanto esforzo.
Os que teñen máis idade iniciaron a reivindicación da galeguización do
ensino dando as súas aulas en galego cando non estaba permitido, xa con
anterioridade ao 75. E, aínda máis, todos os avances acadados até o de agora
teñen uns protagonistas fundamentais: as profesoras e os profesores. E entre
eles hai que mencionar a aqueles docentes que desafiaron os impedimentos e
chegaron a ser expedientados por cometer o delito de dar aulas en galego. A
todo ese traballo incansábel, a tantas mobilizacións, manifestos, sinaturas,
folgas, cursos, horas e horas de estudo, debemos os avances acadados, entre
eles que materias como as ciencias sociais leven máis de vinte anos sendo
impartidas en galego.
E agora pretenden esborrallar esta conquista? Non o podemos permitir,
porque está en xogo o futuro do noso idioma e a nosa propia identidade.
Por iso, desde a Plataforma, consideramos que debemos realizar cantas
iniciativas sexan necesarias, e hai unha que nos parece esencial neste
momento: declarar que seguiremos dando as nosas aulas en galego e
expresar, desde xa, o noso compromiso, deixándolle claro a esta Consellaría
de Educación que, por moitas voltas que lle dean, os e as docentes seguiremos
empregando o noso idioma e, unha vez máis, fracasarán.
Por iso, propoñémosvos que asinedes e enviedes o seguinte texto:

2. Eu, _______________________ , con DI nº ____________, profesor/a do
___________________________________________________ do concello de
________________________,
MANIFESTO a miña desconformidade absoluta coas “Bases para o decreto do
plurilingüismo”, polo que reclamo a súa retirada e o mantemento do actual
Decreto 124/2007.
Así mesmo, declaro que dou as miñas clases en galego e así o seguirei
facendo, pois ese é o único medio posíbel de facer normal o uso do noso
idioma, superando a diglosia en que aínda permanece.
__________ , a ____________ de 2010.
Asdo: __________________________
Plataforma cidadá Queremos Galego
Rúa do Vilar 15,1º
15705- Santiago de Compostela.