1. PRESENTACIÓN DO LIBRO “A ALDEA DA MIÑA INFANCIA”, DE PEPE DOPICO
Pepe Dopico, antigo mestre do CPI Virxe da Cela, visitou o centro o mércores 22 de
xuño para presentar o seu libro “A aldea da miña infancia”, obra recentemente publicada a
través do Concello de Paderne e a Deputación da Coruña.
Se ben o obxectivo inicial da charla era falar desta obra que relata a súa infancia nunha
pequena aldea do rural galego alá polas décadas do 30 e 40 do pasado século, Pepe quixo
transmitir a todo o público alí presente, principalmente mozos e mozas de educación
secundaria, a importancia de achegarse aos nosos maiores para empaparse dos seus
coñecementos e experiencias na vida, e valorar a estes “transmisores” do noso patrimonio
inmaterial.
Ademais de abordar a súa faceta de escritor, Pepe Dopico narrou numerosas
anécdotas acontecidas na súa etapa dedicada á docencia, así como a súa experiencia
percorrendo en varias ocasións o Camiño de Santiago, como xornalista no periódico comarcal
ou as súas incursións no mundo da televisión a través de varios spots publicitarios. Tamén
deixou constancia da súa enorme paixón pola poesía recitando cunha espectacular memoria á
nosa grande poetisa por excelencia, Rosalía de Castro.
Quedámonos coa mensaxe final deste home de 82 anos que destaca pola súa
vitalidade e positivismo: debemos, ante todo, tratar de ser felices, e aproveitar todas “as
cousas boas da vida”.