1. MANIFESTO 25 Novembro 2016
Máis alá do machismo hai unha vida digna para as mulleres
Sen ánimo de adoutrinar nin de mostrar fachenda, o inconformismo dun
grupo de mozos e mozas de Rianxo fai esta chamada á nosa comunidade
contra os prexuízos e a discriminación cara as mulleres.
Non nos erguemos en nome dunha data sinalada no calendario. Hoxe
poñémonos en pé, tentando facer unha protesta forte, densa e implacable
contra o machismo.
A pesar de que, popularmente, O MACHISMO é considerado unha
ideoloxía contraria ó feminismo, en realidade, o machismo é unha actitude de
prepotencia, de superioridade dos homes respecto das mulleres. Os machistas
defenden a supremacía do macho e non aceptan a igualdade entre homes e
mulleres, atentando contra a Declaración Universal dos Dereitos Humanos.
A orixe do machismo está nun prexuízo sexista, do cal xorde un
estereotipo da muller como ser débil, como ser inferior. O prexuízo machista,
como todos os prexuízos, é unha opinión previa ao coñecemento, carece de
fundamento, nace da ignorancia.
Todo isto configura os diversos tipos de violencia contra as mulleres,
afondando no sexismo, que non só se dirixe cara as mulleres, senón tamén
cara os transexuais e intersexuais.
Nós non pertencemos a ningún grupo feminista, pero, como cidadáns e
cidadás dunha sociedade democrática, reclamamos a igualdade de dereitos
entre homes e mulleres.
Ollando ao noso arredor, semella que ninguén é machista. Mais, cando
se aborda o asunto, é doado escoitar EU NON SON MACHISTA,
PERO...
Nós preguntámonos: Pero que? Se non es machista non o es e punto!
Non se pode poñer un “pero” tras dicir “eu non son machista”. Para quen non é
machista non hai pero que valla!
2. Nós arrenegamos de todos aqueles que din:
• Eu non son machista, pero creo que as mulleres deben atender do
fogar.
• Eu non son machista, pero os homes son máis racionais e as mulleres
máis sentimentais.
• Eu non son machista, pero se un neno xoga con bonecas paréceme
afeminado e se unha nena xoga ao fútbol paréceme un marimacho.
• Eu non son machista, pero opino que muller ao volante, perigo
constante.
• Eu non son machista, pero non contrataría na miña empresa a unha
muller por se queda embarazada.
• Eu non son machista, pero creo que moitas das mulleres agredidas
buscárono elas mesmas con escotes e minisaias.
Este falso argumentario constitúe un enorme conxunto de paradoxos,
falacias e contradicións, que nos levan de cabeza aos
MICROMACHISMOS, que de micro non teñen nada!
Nós arrenegamos dos roles sexistas e dos que nolos implantan. Dende
que nacemos somos encarcerados por muros de tixolos nun determinado
molde ao que nos debemos axustar para ser aceptados.
Para as nenas, bonecas e cociñas; para os nenos, balóns e coches. Os
nenos non choran; as nenas non pegan. Os pais fan a patria; as nais fan a
cama.
Nós arrenegamos da Lei do Costume. Cada vez que se produce un
comportamento machista, afundímonos máis e máis nos vellos tempos.
Nós arrenegamos dos temas obrigados. É vergoñoso seguir
escandalizándose ao saber de casos de violencia de xénero cando nós mesmos,
no día a día, fomentamos o machismo con pequenos xestos aparentemente
inofensivos pero que constitúen o xermolo da violencia contra as mulleres.
NÓS estamos cansos, estamos cansas de percorrer camiños vellos xa
fracasados; estamos cansas xa de que a sociedade permita e tolere os
3. comportamentos machistas; estamos cansas de que cada 25 de Novembro
sexan lidas excelentes declaracións institucionais contra a violencia machista e,
ao acabar a lectura, seguir recortando recursos públicos para loitar contra a
violencia de xénero.
En pleno século XXI, cremos que os tempos da igualdade son chegados,
para poder vivir sen medos e decidir por nós mesmas.
Nós non esquecemos que O MACHISMO MATA.
Nos últimos vinte anos, case 1500 mulleres foron asasinadas en España.
Desde 2007, 612 mulleres morreron a mans dos seus maltratadores. No que
vai de ano, levamos 44 mulleres asasinadas. É dicir, cada semana morre unha
muller en España por causa da violencia machista.
En Galicia, a pesar de que a taxa da violencia de xénero é das máis
baixas do estado, o número de denuncias aumentou case un 6%,
contabilizándose 1389 no segundo trimestre do ano.
En consecuencia, RECLAMAMOS:
• Reclamamos unha fala que non estea pervertida pola linguaxe
sexista!
• Reclamamos que os medios de comunicación eviten o
sensacionalismo e non se sirvan de imaxes manipuladas polo
sexismo.
• Reclamamos que a prevención sexa prioritaria e que comece na
escola, pero que non quede aí, porque non só o alumnado, tamén
o profesorado e os nosos pais e nais deben ser formados.
Impedindo que a ignorancia sexa un bo pretexto para o
machismo.
• Reclamamos que as mulleres poidan tomar libremente as
decisións referentes ao seu corpo, á súa sexualidade e á súa
fecundidade.
• Reclamamos que esta loita non se dirixa só á violencia da parella
ou ex-parella contra a muller, senón que tamén vaia dirixida
contra todas as violencias machistas en xeral, incluídos os
4. micromachismos.
RIANXEIROS E RIANXEIRAS!
Agora cómprevos dicir, veciños e veciñas de Rianxo, se pensades seguir
indo costa abaixo polo tempo ou encamiñarvos cara un futuro de xustiza e
igualdade onde a muller poida ter os mesmos dereitos laborais e sociais que o
home.
Se queredes liberarvos do xerme do Machismo e da Morte. Se queredes
adornarvos da Igualdade ou seguir sacrificándoa no altar dos Prexuízos.
Non esquezades que o Machismo Mata e a metade da Humanidade ten
que seguir vivindo. Queremos seguir vivindo!. Por iso non podemos permitir
un asasinato máis.
Cómpre romper a marcha pola mesma estrada que fagamos cos nosos
pasos, xuntos, xuntas, e afrontar nela unha peregrinación sen chegada,
porque en cada relanzo do camiño agárdanos unha voz que nos berra:
"Máis alá do machismo hai unha vida digna para as
mulleres!"
En Rianxo a, 25 de Novembro de 2016
Asinado polo alumnado de 1º de Bacharelato – A do IES Félix Muriel