3. Անվանման առաջացումը կապված է Ինդոս գետի հետ, որի
հովտով հնդիկները ցամաքային կապ են պահպանել Առաջավոր
Ասիայի երկրների, հատկապես իրենց անմիջական հարևանի Իրանի հետ։ Ինդոս
գետը սանսկրիտերեն կոչվել է Սինդուհան , որը հին պարսիկներին է անցել Հինդ
ձևով։ Հենց պարսիկներն էլ իրենց հարևան երկիրը կոչել են Հինդուստան այսինքն
«Ինդոս գետի երկիր»։ Ի դեպ, հինդի լեզվով ևս այժմ Հնդկաստանը կոչվում է
Հինդուստան։ Պարսիկներից էլ այդ անվանումը անցավ այլ ժողովուրդների, այդ
թվում նաև հայերին` արդեն որոշ ձևափոխություններով։ Երկրի
անվանման Եվրոպայում ընդունված India ձևը նույնպես առաջացել է Ինդոս գետի
անվանումից, որին ավելացվել է երկրի իմաստ արտահայտող -ia վերջածանցը։

4. 1949-ին ընդունված սահմանադրության համաձայն, Հնդկաստանը հռչակվեց
հանրապետություն և կոչվեց Հնդկաստանի Հանրապետություն, անգլերեն,
որը պաշտոնական լեզուն էր, Republic of India։Հինդի լեզվով, որը երկրի
պաշտոնական լեզուն է, Հնդկաստանը կոչվում է Բհարաթ։ Այդ անվանումն
առաջացել է արիների հին հնդկական Բհարթա ցեղի տարաբնակեցման
շրջանի Բհարաթավարշի անունից, որը հնում հաճախ տարածվել է ամբողջ
Հնդկաստանի վրա։

5. Հնդկաստանի միջին մասով անցնում է Հյուսիսային արևադարձը, որը երկիրը
բաժանում է մոտավորապես երկու հավասար մասերի։ Հետևապես, Հնդկաստանի
կեսը գտնվում է տաք գոտում, իսկ մյուս կեսը մերձարևադարձներում։
Հնդկաստանը Ասիայի մնացած մասերից անջատված է լեռնային պարսպով և
հյուսիսային ցուրտ հոսանքները այնտեղ մուտք չեն գործում, որի հետևանքով
Հնդկաստանի հյուսիսային մասերում օդի տարեկան միջին ջերմաստիճանը հինգ
աստիճանով ավելի բարձր է, քան աշխարհագրական նույն լայնությունների վրա
գտնվող երկրներինը։ Ընդհանուր առմամբ Հնդկաստանի կլիման ամենուրեք տաք է։
Հով եղանակի շրջանը Հնդկաստանում ընդգրկում է նոյեմբերից փետրվար ամիսները,
տաք եղանակի շրջանը` մարտից մայիս, իսկ անձրևային ժամանակը` հունիսից
սեպտեմբեր։ Հոկտեմբերը համարվում է անցողիկ ամիս` անձրևային և ցուրտ
ժամանակաշրջանների միջև։ Ձմեռվա ամիսներին, բացառությամբ բարձր լեռնային
մասերի, ամենուրեք հունվարյան ջերմաստիճանը հավասար է մեր
հանրապետության ամենատաք շրջանի` Արարտյան դաշտի հուլիսյան
ջերմաստիճանին։ Ջերմության առատությունը թույլ է տալիս այստեղ տարեկան
երկուսից երեք բերք ստանալու։ Հնդկաստանի կլիմայի վրա վճռական դեր են
խաղում մուսսոնները։