1. A NOSA PAISAXE, A NOSA VIDA
Mural
Realización dun mural na parede do peche frontal do centro.
Este proxecto levouse a cabo en colaboración con Educación Infantil , Primaria e Secundaria. As profesoras
responsables foron Mercedes Dosinda Sánchez e Marta Novo. O proxecto consistiu en parcelar a parede e traballar por sectores
de maneira colectiva unhas imaxes, todas elas baixo o tema de: “O contorno”. Os grupos traballaron coa súa profesora de plástica
a idea, fixeron os bosquexos, e por último saíron nas datas programadas a pintalo na parede. Esta última fase comezámola no
curso 2011-12 e rematámola no presente curso 2012-13.
Comezamos pedíndolle axuda ao concello para preparar a parede xa que estaba con cemento pero moi deteriorada. O
concello enviounos uns obreiros que en poucos días tiñan o muro rematado. Isto foi xa no mes de setembro do ano 2011. Así no
primeiro trimestre comezamos a fase de planificación do proxecto.
Decidimos que tíñamos que ter un tema para unificar cada parte que despois ían a traballar por cursos. Optamos polo
tema da contorna por ser o suficientemente amplo para que dende infantil a 4º de ESO puidesen aportar a súa intervención,
ademais de ser un tema relevante nos currículos.
Despois pasamos a medir e facer os planos do muro. Esta tarefa levárona a cabo os alumnos de Educación Plástica e
Visual de 4º de ESO. O muro mide 115m e ten 25 columnas que o dividen en anacos de 5m, pero que como se observa na imaxe
con alturas moi distintas, dende 1,70m na parte máis alta ata a 0,5m na máis baixa.
Unha vez feitos os planos o dividimos en función dos grupos tendo en conta as idades e o número de alumnos de cada
grupo.
Tamén ao longo deste primeiro trimestre decidimos o tipo de pintura que íamos a usar, xa que tiña que ser resistente
(para exteriores), pero tamén que a puideran utilizar os nenos sen risco. Tamén tiñamos que ter en conta que necesariamente tiña
que abarcar unha gama o suficientemente ampla como para poder obter calquera cor. Calculamos a cantidade de pintura necesaria
e investigamos sobre as distintas imprimacións que se podían utilizar.
Como todo o traballo de pintar era ao aire libre, non podiamos facelo ata que houbera unhas condicións meteorolóxicas
favorables, polo tanto deixamos esta parte para a terceira avaliación.
Ao principio da terceira avaliación traballamos cos alumnos nas aulas as ideas para o proxecto. Individualmente fixeron
bosquexos cas distintas ideas que propoñían. Despois entre alumnos e profesores seleccionamos as ideas que mellor resultaban
para a proposta. Nalgúns casos volveuse a traballar de novo esta proposta seleccionada, noutros varias das propostas individuais
se unificaron nunha sola.
Pouco a pouco fomos unindo as distintas propostas nun todo único. O muro arranca na parte dereita, a máis alta, cun
fondo mariño coma si este fose o inicio dunha viaxe, que percorre o mar, achégase a costa onde vemos unha vila reflectida no
mar, despois unha cidade que identificamos como A Coruña pola torre de Hércules, despois seguimos cunha praia, que nos
sabemos que é Miño na ría de Betanzos, e seguimos pola ría buscando o Eume, e entón segue Pontedeume, onde vemos a
desembocadura do río que vai dar o nome ás Fragas, e que van ser as protagonistas de moitos metros do noso muro. A paisaxe da
nosa contorna vese representada agora con prados floridos cheos de bolboretas, caracois e paxaros, avanzando atopamos outros
animais, o raposo, coellos nas súas tobeiras, cervos e moitos máis.
Seguindo adiante volve a aparecer o río e ata o encoro do Eume, cos peixes e outros animais que poboan as Fragas.
A continuación aparecen as terras traballadas polas xentes de Monfero, con moitos cultivos distintos, as casas, os
tractores e ata un rally polas montañas. Tamén temos o mosteiro, a obra arquitectónica máis representativa de Monfero.
E xa por fin atopamos representada a nosa escola a través dos proxectos: Monfero Solidario e o intercambio ca India, e
das ideas: frases e palabras que falan de educación e de valores. Rematando esta parte, e xa que estamos co mundo das ideas,
temos unha parte abstracta cun fondo branco e chea de cores, transmitindo alegría e poñendo fin a este percorrido pola nosa
paisaxe.
A parte final do muro está dedicada ás firmas. Pintamos un muro de ladrillos e cada alumno pintou o seu con distintas
cores e despois puxo seu nome.