1. Sèmita di branu
Mi sciùta fruscèndi lu ’entu
affaccammanu
muèndi la ’janna sghinta
di la rasgioni.
Spanna lu céli
palisèndi lu cunsolu
di lu branu.
L’affroddhulu di la ciurrata
d’impruisu spiana
la stritta bugghjosa
di lu sintitu
dendi canchériu a l’umbra
dirrugghjàta.
Curri a briddha sciolta
lu ’judiziu
cantarinendi galanu
ghjompa la ’ena ridendi
candu l’abbentu
li pogli la manu...
Lu tempu...
scugnendi méli di stasgioni
ghjoca muru muru
illa sèmita fiurita...
Lu stìu , illu caponi
è balzighendi e
illu riu
lu sintimentu è biendi.
...la filumena in cantu
arréa a La Trona e ciocca...
“Déu pusàtu”* è figghjulendi
da lu piciu di la rocca...
* M.d.d. teresino per indicare una situazione di pace e serenità