1. CRISTINA GARMENDIA (1962) É unha bióloga e empresaria española nada en San Sebastián. Aínda que non ten militancia no partido socialista con anterioridade ao seu cargo, é a actual Ministra de Ciencia e Innovación. Estudou a carreira na Universidade de Sevilla e fixo os seus estudos de doutoramento vinculado ao CSIC dentro do Centro de Biolgía Molecular Severo Ochoa. Ao tempo, foi profesora axudante do departamento de Genética y Biología Molecular da Universidad Autónoma de Madrid. Doutorouse baixo a dirección da eminente científica Margarita Salas. Foi presidenta da Fundación Inbiomed, fundación que alberga o primeiro banco de células nai adultas en España, e, dende o 2005, é presidenta da Asociación Española de Bioempresas. No ano 2000 fundou Genetrix, empresa do sector da biotecnoloxía. Esta empresa traballa no desenvolvemento das tecnoloxías biomédicas e medicamentos. É, por tanto, defensora do uso das células nai embrionarias e pioneira ao sentar as bases dunha industria biotecnolóxica en España. En xaneiro de 2008 foi galardoada co Tambor de Oro, máxima distinción da súa cidade natal, que premia a aqueles que contribúen a promocionar a imaxe de San Sebastián. Neste mesmo ano, José Luis Rodríguez Zapatero elixiuna como titular dun ministerio de novo cuño coa misión fundamental de potenciar o I+D (Investigación y Desarrollo), faceta económica e científica na que o país arrastra un retraso histórico con respecto a outras nacións europeas.