kolom

1. Kolom
ÉRA VS REUEUS
Dina hiji kendaraan umum kuring manggihan pamuda ngomong maké Basa Sunda ka
babaturanna, tapi teu lila babaturanna téh ngomong ngaharéwos tapi tarik nepi kadéngé, “ulah
maké Basa Sunda di dieu éra!”. Tungtungna éta pamuda ngaromongna maké basa Indonesia.
Fénoména éta kacida pikawatireunna, matak miris kana haté. Kumaha basa Sunda bisa
tetep hurip hirup di Tatar Sunda lamun panyatur aslina gé geus teu hayangeun maké? Éta
mangrupa patalékan saréréa anu ngarasa masih kénéh maliré kana ayana basa Sunda. Jigana
benér ceuk para ahli, yéh sababaraha taun kahareup Basa Sunda bakal ditaringgalkeun, bakal
tumpur kulantaran geus euweuh anu daék makéna ogé.
Tapi ditempo di tempat anu nyétak jelema-jelema anu bakal satia ngajaga basa Sunda
saperti Jurusan Pendidikan Basa jeung Sastra Sunda di UPI, teu saeutik mahasiswa anu
angger maké basa “Indonesia Raya”. Maranéhna leuwih remen ngarobrol maké basa
Indonesia tibatan maké basa Sunda. Sakapeung mah teu kaharti ku naon bisa kitu. Naha aréra
maké atawa kumaha? Sanajan kitu, teu saeutik ogé mahasiswa anu daék maké basa Sunda.
Malah maranéhna anu biasa maké basa Sunda, loba anu ngarasa reueus cenah. Ku lantaran
maranéhna boga sawangan yén lamun teu dijaga jeung diriksa ku urang salaku urang Sunda
rék ku saha deui? Bener pisan sawangan éta téh. Reueus maké basa Sunda mutlak
diperlukeun ku jalma-jalma anu ngaku urang Sunda sarta nyicikan daérah Sunda.
Éra jeung reueus maké basa Sunda kacida patukang tonggongna. Tapi kitu kaayaan anu
dirasakeun jaman kiwari. Aya anu éra, aya anu ogé reueus maké basa Sunda téh. Nu ngarasa
éra mah nyaéta anu ngarasa géngsi ceuk basa gaulna mah, anu ngarasa katinggaleun jaman
mun maké Basa Sunda. Tapi keukeuh, teuing kumaha pipikiranna anu ngarasa éra maké basa
Sunda? Padahal ti leuleutik téh pan geus dipapatahan ku kolotna maké basa Sunda meureun?
Iwal ti nu ti leutikna dipapatahan maké Basa Indonesia. Jigana mah nu matak éra téh,
kulantaran loba campur gaul jeung jalma-jalma anu kalangenanna maké basa Indonesia. Tapi
sabenerna lamun anu biasa maké Basa Indonesia tuluy diajarkeun basa Sunda, biasana
ngarasa reueus lamun bisa maké basa Sunda nu hadé ter bener, sarta ngarasa resep lamun bisa
maké dina kahirupan sapopoéna.
Tresna Yuniawati (0807298)