1. Súkkulaði- og chili-trufflur Óvenjulegar og öðruvísi trufflur.

2. Innihald 275 g Síríus Konsum 70% súkkulaði 50 g smjör, skorið í bita 3 dl rjómi 1¾ tsk. chili-duft 2 msk. Kahlúa-líkjör (má sleppa) 2 msk. Cadbury’s kakó Sykraðar chili-ræmur: 250 g sykur 3 dl vatn 3 chili-aldin, fræhreinsuð og skorin í ræmur

3. Aðferð Hitið súkkulaði, smjör, rjóma og 1¾ tsk. chili-duft saman í potti við hægan hita. Hrærið í öðru hverju þar til blandan er orðin slétt og samfelld. Leyfið blöndunni að kólna þar til hún tekur að þykkna dálítið. Hrærið þá líkjörinn saman við, þeytið blönduna með handþeytara og kælið hana svo í kæliskáp þar til hún er orðin stíf.

4. Aðferð Takið eina teskeið af kreminu og mótið í kúlu. Endurtakið þar til kremið er uppurið og raðið kúlunum á plötu sem hefur verið klædd með bökunarpappír. Kælið. Veltið trufflunum upp úr kakói. Kælið í minnst 2 klukkustundir. Skreytið með sykruðum chili-ræmum.

5. Aðferð – Sykraðar chili-ræmur Setjið sykur og vatn í pott. Hitið þar til sykurinn er orðinn uppleystur og látið blönduna þá sjóða í 1 mínútu. Bætið chili-ræmunum út í, lækkið hitann og látið malla í 25 mínútur. Fjarlægið pottinn af hellunni og látið chili-ræmurnar standa í sírópinu í 2 klukkustundir áður en þær eru veiddar upp úr og látnar kólna alveg á bökunarpappír. Verði ykkur að góðu!